وزیر مملکت برائے داخلہ طلال چوہدری نے کہا ہے کہ جتنے مرضی وزرائے اعلیٰ بدلیں، دہشتگردی کے خلاف آپریشن نہیں رکے گا۔
جڑانوالہ میں نادرا دفتر کے افتتاحی تقریب میں گفتگو کرتے ہوئے طلال چوہدری کا کہنا تھاکہ پاکستان عالمی سطح پر کامیاب ہو رہا ہے اور آج پاکستان کا ڈنکا پوری دنیا میں بج رہا ہے۔
انہوں نے کہا کہ شہباز شریف نے تب نام لیا جب لوگ اسرائیل کا نام لینے سے ڈرتے تھے، غزہ میں جشن ہوا، فلسطینیوں کو آزاد ریاست نظر آ رہی ہے۔
ان کا کہنا تھاکہ کہتے ہیں حکومت اسٹیبلشمنٹ کے کہنے پر چلتی ہے، یہ کیوں نہیں کہا جاتا اسٹیبلشمنٹ حکومت کو سپورٹ کرتی ہے۔
طلال چوہدری کا کہناتھاکہ ریاست فیصلہ کر چکی، اب کسی سے بلیک میل نہیں ہوں گے، بندوق یا نعرے سے بلیک میل کرنے کی اجازت نہیں دی جائے گی، جتنے مرضی وزرائے اعلیٰ بدلیں، دہشتگردی کے خلاف آپریشن نہیں رکے گا، جنرل اور کرنل شہادتیں دے رہے ہیں، دنیا میں ایسی مثال نہیں۔
انہوں نے مزید کہا کہ چند سو لوگ سڑکوں پر نکل آئے، اگر طاقت کا استعمال ہوا تو؟ ریاست کے خلاف ملک میں کہیں بھی سیاست کی اجازت نہیں ہوگی، ریاست کو طیش دلانے کی کوشش کی گئی ہمارے کئی لوگ زخمی ہوئے ، کئی درجن لوگ ہمارے زخمی ہوئے ہیں۔
