اسلام آباد(مانیٹرنگ ڈیسک)پاکستان میں کرونا کی تیسری لہر میں ہرگزرتے دن کے ساتھ شدت آتی جارہی ہے،ہفتہ کو جولائی کے بعد ملک میں ایک دن کے دوران سب سے زیادہ 3876کیسز رپورٹ ہوئے،کرونا میں مبتلا ہونے والوں میں ن لیگ کے سینیٹر عرفان صدیقی بھی شامل ہیںگزشتہ روز مہلک وبا سے 42افراد جان کی بازی ہارگئے،وزیراعظم کے معاون خصوصی فیصل نے عوام کو خبردار کیا ہے کہ اگر احتیاط نہ کی تو صورتحال ہاتھ سے نکل سکتی ہے۔نیشنل کمانڈ اینڈ آپریشن سینٹر کی طرف سے جاری اعدادو شمار کے مطابق گزشتہ 24 گھنٹوں کے دوران ملک بھر میں 3 ہزار 876 افراد کے کووڈ۔19 کے ٹیسٹ مثبت آئے جس کے بعد مجموعی کیسز کی تعداد 6 لاکھ 23 ہزار 135 ہو گئی ہے۔یہ 8 ماہ کے بعد ملک میں ایک دن میں رپورٹ ہونے والے کیسز کی سب سے بڑی تعداد ہے ، اس سے قبل 2 جولائی 2020 کو ملک میں آخری بار 3ہزار 800 سے زائد کیسز رپورٹ ہوئے تھے۔چوبیس گھنٹوں کے دوران مزید 42 افراد زندگی کی بازی بھی ہار گئے جن میں سے 15 وینٹیلیٹر پر موجود مریض تھے جس کے بعد ملک بھر میں مجموعی اموات کی تعداد 13 ہزار 799 ہو گئی ہے۔گزشتہ 24 گھنٹوں کے دوران صوبہ سندھ جواس وبا سے ملک بھر میں سب سے زیادہ متاثر ہونے والا صوبہ ہے میں مزید 293 افراد میں وائرس کی تصدیق ہوئی جس کے بعد صوبے میں وائرس سے متاثرہ افراد کی مجموعی تعداد 2 لاکھ 62 ہزار 796 ہو گئی ہے۔گزشتہ 24 گھنٹے کے دوران صوبے میں مزید 5 اموات ہوئیں جس کے بعد اموات کی مجموعی تعداد 4 ہزار 478 ہو گئی ہے۔ صوبہ پنجاب میں سب سے زیادہ 2 ہزار 33 افراد میں وائرس کی تصدیق ہوئی جس کے بعد صوبے میں کیسز کی مجموعی تعداد ایک لاکھ 95 ہزار 87 ہو گئی ہے۔اس دوران 25 افراد ہلاک بھی ہوئے جس کے بعد اب تک ملک کے سب سے بڑے صوبے میں مرنے والوں کی مجموعی تعداد 5 ہزار 944 ہو گئی ہے۔ خیبر پختونخوا میں بھی مزید 681 افراد میں وائرس کی تصدیق ہوئی جس کے بعد کیسز کی مجموعی تعداد 78 ہزار 653 ہو گئی ہے۔گزشتہ 24 گھنٹے کے دوران صوبے میں مزید 6 اموات بھی ہوئیں جس کے بعد مرنے والوں کی کل تعداد 2 ہزار 202 ہو گئی ہے۔ بلوچستان میں بھی مزید 16 افراد میں وائرس کی تصدیق ہوئی جس کے بعد کیسز کی کْل تعداد 19 ہزار 306 ہو گئی ہے۔صوبے میں گزشتہ 24 گھنٹے میں ایک شخص زندگی کی بازی ہار گیا جس کے بعد اب تک مجموعی اموات کی تعداد 203 ہو گئی ہے۔ وفاقی دارالحکومت اسلام آباد میں مزید 747 افراد وائرس کا شکار ہو گئے جس کے بعد کیسز کی تعداد 50 ہزار 843 ہو گئی ہے۔اسلام آباد میں مزید 3 افراد لقمہ اجل بن گئے جس کے بعد مرنے والوں کی تعداد 539 ہو گئی ہے۔ آزاد کشمیر میں بھی مزید 106 افراد میں وائرس کی تصدیق ہوئی جس کے بعد کیسز کی تعداد 11 ہزار 843 ہو گئی ہے۔گزشتہ 24 گھنٹے کے دوران آزاد کشمیر میں 2 اموات بھی ہوئی جس کے بعد اب تک وہاں 330 افراد وائرس کا شکار ہو کر دم توڑ چکے ہیں۔ چوبیس گھنٹوں کے دوران ملک بھر میں کرونا کے 40 ہزار 946 ٹیسٹ کیے گئے جن میں سے سندھ میں 10 ہزار 445، پنجاب میں 15 ہزار 212، خیبرپختونخوا میں 7 ہزار 753، اسلام آباد میں 5 ہزار 958، بلوچستان میں 362، گلگت بلتستان میں 330، آزاد کشمیر میں 866 ٹیسٹ شامل ہیں۔گزشتہ 24 گھنٹوں کے دوران مزید ایک ہزار 446 مریض صحتیاب بھی ہوئے جس کے بعد کووڈ۔19 سے صحتیاب ہونے والوں کی تعداد 5 لاکھ 79 ہزار 760 ہو چکی ہے۔
کرونا کی تیسری لہر:شدت تیز، ایک دن کے دوران سب سے زیادہ 3876کیسز رپورٹ
