چوروں نے دنیا کے مشہور ترین میوزیم سے چند منٹوں کے اندر انمول زیورات کو چرا لیا اور کامیابی سے فرار ہوگئے۔
فرانس کے وزیر داخلہ Laurent Nuñez نے ایک ریڈیو انٹرویو کے دوران بتایا کہ چوروں نے پیرس کے لوور میوزیم میں 7 منٹ کے اندر قیمتی زیورات کو چوری کیا۔
انہوں نے بتایا کہ ‘ایک بڑی ڈکیتی لوور میوزیم کے اپولو روم میں 19 اکتوبر کی صبح ہوئی، چند افراد باہر سے ایک ایلیویٹر استعمال کرکے میوزیم میں داخل ہوئے’۔
اپولو روم میں فرانسیسی شاہی زیورات اور دیگر نایاب نوادرات موجود ہیں۔
فرانسیسی وزیر داخلہ کے مطابق چوروں نے ایک کھڑکی کو کاٹ کر زیورات کو چرالیا جن کی مالیت انمول ہے۔
ان کے مطابق یہ واردات 3 سے 4 افراد نے کی۔فرانسیسی وزیر ثقافت Rachida Dati کے مطابق زیور کا ایک ٹکڑا میوزیم کے قریب سے ملا۔
وزارت داخلہ کی جانب سے جاری بیان کے مطابق چوری کی گئی اشیا کی تفصیلی فہرست مرتب کی جا رہی ہے، جن کی ثقافتی اور تاریخی قدر کا تعین نہیں کیا جاسکتا۔
Laurent Nuñez نے بتایا کہ 7 منٹ میں اپنی کارروائی مکمل کرکے چور موٹرسائیکلوں پر فرار ہوگئے۔
ان کا کہنا تھا کہ ‘یہ واضح ہے کہ ایک ٹیم نے اس جگہ کی مانیٹرنگ کی اور یہ بھی واضح ہے کہ یہ بہت ماہر ٹیم تھی جس نے ہر کام برق رفتاری سے مکمل کیا’۔
انہوں نے بتایا کہ ‘میں پراعتماد ہوں کہ ہم بہت جلد ملزمان کو تلاش کرلیں گے اور تمام سامان کو بازیاب کرالیں گے’۔
فرانسیسی وزارت داخلہ کے مطابق یہ واقعہ مقامی وقت کے مطابق صبح ساڑھے 9 بجے پیش آیا اور میوزیم کو وہاں موجود افراد سے خالی کرالیا گیا۔پیرس کا یہ میوزیم دنیا کے مشہور ترین آرٹ ورکس بشمول مونا لیزا پینٹنگ کا گھر ہے اور اسے 19 اکتوبر کو بند رکھا جائے گا۔
وسطی پیرس کے میئر Ariel Weil نے صحافیوں سے بات کرتے ہوئے کہا کہ چوروں نے زبردست منصوبہ بندی کی اور ہمیں یاد نہیں کہ لوور میوزیم کو ایک دہائی سے زائد عرصے سے اس طرح کے کسی واقعے کا سامنا ہوا ہے۔
آخری بار ایسا 1911 میں ہوا تھا جب مونا لیزا کو چرا لیا گیا تھا۔
