فیس بک کو دنیا کا مقبول ترین سوشل میڈیا پلیٹ فارم قرار دیا جاتا ہے جس کے صارفین کی تعداد اربوں میں ہے۔
میٹا کے اس پلیٹ فارم میں اتنے زیادہ فیچرز موجود ہیں کہ متعدد نئی اپ ڈیٹس کا صارفین کو علم بھی نہیں ہوتا کیونکہ کمپنی کی جانب سے اکثر اعلان ہی نہیں کیا جاتا۔
ایسا ہی ایک نیا فیچر فیس بک میں اس کمپنی نے خاموشی سے شامل کر دیا ہے جو پوسٹنگ کے عمل کو زیادہ بہتر بنائے گا۔میٹا کی جانب سے آرٹی فیشل انٹیلی جنس (اے آئی) کو ایپس کے مختلف حصوں میں شامل کیا جا رہا ہے۔
میٹا اے آئی کو ابھی آپ اپنی مرضی کی تصاویر تیار کرانے کے لیے بھی استعمال کرسکتے ہیں، بس تحریری ہدایات دینے کی ضرورت ہوتی ہے۔مگر یہ عمل فیس بک میں ابھی تک میٹا اے آئی سے براہ راست چیٹ یا دیگر طریقوں سے ممکن ہوتا تھا۔
مگر اب آپ براہ راست فیس بک پوسٹس میں میٹا اے آئی کو تصاویر کی تیاری کے لیے استعمال کرسکیں گے۔اس مقصد کے لیے فیس بک کے واٹس آن یور مائنڈ پوسٹ باکس میں ایک نئے بٹن کا اضافہ کیا گیا ہے۔
یہ بٹن اس باکس میں نیچے دائیں جانب ایموجی فیس کے برابر میں بنا ہوا ہوگا جس پر کلک کرکے آپ میٹا اے آئی سے اپنی مرضی کی تصاویر تیار کروا سکتے ہیں۔
جب آپ تحریری ہدایات دیں گے تو میٹا اے آئی کی جانب سے تصویر کے 4 آپشنز دیے جائیں گے جن میں سے کسی ایک کو آپ سلیکٹ کرسکتے ہیں۔
بائیں جانب اے آئی کی تیار کردہ تصویر کو ایڈٹ کرنے کے لیے مختلف آپشنز بھی موجود ہوں گے۔جب آپ پوری طرح مطمئن ہو جائیں تو بس ڈن پر کلک کرکے اسے پوسٹ کرسکتے ہیں۔
یہ فیچر بتدریج متعارف کرانے کا سلسلہ شروع ہوا ہے اور ابھی تمام افراد کو دستیاب نہیں۔مگر امید ہے کہ آئندہ چند روز یا ہفتوں میں اسے تمام صارفین کے لیے متعارف کرا دیا جائے گا۔
