سردی کی دستک ،گلگت بلتستان کے پہاڑوں پر برفباری

گلگت(آئی این پی )گلگت بلتستان اور مانسہرہ کے سیاحتی علاقوں میں موسم کی پہلی برف باری کا آغاز ہوگیا جس سے علاقے کا منظر خوبصورت اور برف سے ڈھک گیا ہے۔ برف باری کے ساتھ ساتھ سردی میں بھی اضافہ ہوگیا ہے جس سے مقامی باشندوں اور سیاحوں کو مشکلات کا سامنا ہے۔ گلگت بلتستان کے بلند پہاڑوں پر موسم کی پہلی برف باری نے علاقے کو سفید چادر میں ڈھانپ لیا۔ برف باری کا آغاز گلگت کے قریب ساڑھے چار ہزار میٹر کی بلندی سے ہوا اور اس کا اثر خنجراب، بابوسر اور برزول ٹاپ جیسے دور دراز علاقوں تک پھیل چکا ہے۔ برف باری کی وجہ سے بالائی علاقوں میں شدید سردی کا سامنا ہے۔ تیز آندھی کے ساتھ ہلکی بارش بھی ہوئی ہے جس سے موسم مزید سرد اور برفیلا ہو گیا ہے۔ سیاحوں اور مقامی لوگوں کے لئے سردی سے بچا ئوکے انتظامات کئے جا رہے ہیں۔دوسری جانب مانسہرہ کے سیاحتی مقامات جیسے بابو سر ٹاپ، بیسر اور نوری ٹاپ پر بھی برف باری کا آغاز ہو چکا ہے۔ بابو سر ٹاپ پر ہلکی برف باری سے علاقے کا منظر دلکش ہوگیا ہے اور سیاحوں کی بڑی تعداد نے ان سیاحتی مقامات کا رخ کیا ہے۔